জীৱন সলনি হয়ে বা ক'ত..? - ️প্ৰিয়াক্ষী চুতীয়া

 জীৱন সলনি হয়ে বা ক'ত..? 

লহপহকৈ বাঢ়ি অহা লাইজুলীয়া স্বপ্ন

আহ্লাদিত জীৱন চক্ৰ …

আদ্ৰাঙী আভাৰে পূৰ্ণাংগ পৰাণে

ধূসৰতাত ডুব যায় ক'ত ?
 

পলাশৰঙী হাঁহিটি

ম্লানৰ ধুমুহাৰ গ্ৰাসত বিলীন হৈ পৰে

প্ৰজ্জোল নয়নজুৰিও সেমেকি উঠে

জীৱনৰ কোন কেকুৰিত,, ?

 

ৰজনীৰ নিস্তব্দতাত সপোন ৰচা

মৰুময় বালিত মৰিচিকা বিচাৰা

সৰাপাতত জীৱন বিচাৰি পোৱা

জ্যোস্নাবৃক্ষ জুপি এন্ধাৰে আৱৰে

জীৱনৰ কোনটো আসোঁৱাহ হৃদয়ত সামৰি,, ?

 

হয়তো, বিচ্ছেদৰ অভিমানী ধুমুহাজাকত

নাইবা অভিমানী হৃদয়ৰ অসঙ্গত দাবীবোৰত

জীৱনে বিচাৰি পায় এটি লেচু

সলনি কৰিবলৈ আহ্লাদিত সেই জীৱনচক্ৰ ।

 

ৰহস্যময়ী জীৱনৰ চাহিদা পূৰণৰ আকুলতাত

স্বপ্নভঙ্গুৰ বিষাদে গ্ৰাস কৰা সমীৰণৰ পৰশত,,,,,

বিষণ্ণ আবেলিটোৰ কোলাত সঁপি দিয়ে জীৱনে

অস্ত আকাশত ওলমি ৰোৱা হেঙূল বেলিটিৰ অনুৰূপ হাঁহিটি আৰু

হৃদয়ৰ উৎসুকতা - আকাংক্ষাবোৰ ।

 

দুৰ্বোধ্যতাৰ আঁৰত ও যেন লুপ্তপ্ৰায়

জীৱনৰ এক নতুন অৱতাৰ

নিৰাশাক  প্ৰতিৰোধ কৰি, মৃত্যুক স্বীকাৰ কৰি

আশাবোৰকে সাৰথি কৰি জীৱনে সংগ্ৰাম কৰে সলনি কৰে জীৱনৰ অন্ধকাৰচ্ছন্ন কেঁকুৰি ।

 

আজুহাতবিহীন এটি সম্পৰ্কৰ সৰলতাত

শূণ্যতাক জয় কৰা এখনি হৃদয়ৰ ঠিকনাত

জীৱনে উপভোগ কৰে জীৱনৰ সাঁথৰ

ভংগ স্বপ্নৰ সমাধিতে নতুনত্বৰ সন্ধান কৰি ।

 

✍️প্ৰিয়াক্ষী চুতীয়া

কচুপথাৰ গাঁও,চেপন

স্নাতক চতুৰ্থ বৰ্ষ ।

মনোহৰী  দেৱী কানৈ মহিলা মহাবিদ্যালয়